近日「A級美腿A級純美魔女」宮雪花被發現，呢幾個月嚟都愛上港女台妹嘅恩物，一個比化妝品更偉大嘅發明---「美圖秀秀」。一班用得純熟嘅港女，唔使花錢整容，用部手機篤兩篤，超大眼V煞面超長腿乜都有，仲可能冇乜破綻添。
而純美魔女花姨，畫畫就叻，但用電腦「執後期」就麻麻，佢個千幾人關注嘅微博，幾個月前已經PO咗啲佢用美圖秀秀將自己執靚靚嘅相，不過佢封相功力仲有好大改進空間，執到連旁邊啲欄杆都變形，直頭去咗五次元空間咁款，配埋佢執完個樣，其實又真係冇違和感，因為都唔似喺地球人嘛!
花姨噚晚出席亞姐活動就撒嬌話自己只係執相技術未到家，不過今日DJ少爺占已經忍唔住抽水，用「美圖秀秀」大執自己個樣，佢就擺明玩嘢，執到隻眼超大，塊面超V，成個外星人咁款，仲叫自己做「宮雪占」，其實港女用「美圖秀秀」，佢哋算唔算「不誠實使用電腦」?
