蔡天鳳碎屍案丨好友爆Abby兩任丈夫時有接觸 陪做物理治療誘譚仔太子爺賭錢
名媛兼女模特兒蔡天鳳（Abby）碎屍案轟動全港，其友人豹太接連接受傳媒訪問大爆蔡天鳳生前與前夫一家的關係，並大讚對方為人有情有義，對前夫一家照顧有加。昨晚（25日）豹太再受訪大爆蔡天鳳前夫與現任丈夫、譚仔太子爺的關係，又指蔡天鳳曾明知蝕本都打本給前夫一家做生意。
豹太受訪時指，蔡天鳳生前從來不說人壞話，對前夫一家亦是有讚冇彈，更指前夫一家細心照顧一對子女。又指蔡天鳳令前老爺奶奶與現任老爺奶奶相處得非常好，雙方更曾相約去慈山寺，更不時聚會：「過年仲租咗個Party room三個家庭聚會，係好到可以咁㗎！」豹太大讚蔡天鳳為人有義氣，而且與前夫是和平離婚，因此才願意照顧前夫一家。
豹太更透露，蔡天鳳兩任丈夫亦不時有接觸，豹太表示與蔡天鳳前夫有過一面之緣，「因為Abby一直都話佢處理得好好嘅，我信Abby嘅。有次Abby現任丈夫Chris上年溜冰跌親腳，斷咗骨，之後要做物理治療。我介紹咗個物理治療師畀佢，咁啱我都去做治療，就聽到Chris身邊有個人，點解身邊有個男仔講啲嘢咁樣㗎，後來我哋先知佢係疑兇Alex（Abby前夫）囉！佢（Alex）話不如我哋而家唔好做物理治療，不如我而家帶你去賭錢啦！Chris就話『唔好啦，我都唔賭錢嘅，同埋我唔想呃Abby呀，同埋我隻腳都要醫㗎，我真係斷咗腳』。」
豹太當日聽到以上對話後曾致電蔡天鳳：「我話你知唔知你老公今日有個人陪佢物理治療，我問佢邊個嚟，識唔識。佢話『我識，嗰個咪我前夫囉，Ok㗎冇問題』。」豹太將當日聽到的對話告訴蔡天鳳，對方更認為沒有大不了，並表示Chris不會賭錢。不過豹太憶述對蔡天鳳前夫Alex的感覺，就表示：「連物理治療個醫師都打畀我，問我可唔可以以後叫嗰個人（蔡天鳳前夫Alex）唔好上嚟，話佢好『MK』、好『古惑仔』呀！影響到我哋做嘢呀！」
豹太又大爆蔡天鳳對前夫一家非常包容，甚至連打本做蝕本生意都沒有問題：「佢係好到，當初同我講佢有做生意，佢冇講到係前夫做（要求）。」豹太指蔡天鳳當時透露她投資開雞蛋仔店，更表示已經投資的錢已經賠光，但也表示無所謂，「但我哋之前唔知係前夫叫佢做，我以為係Abby想搵啲嘢搞吓啦！如果知道係前夫叫佢做，我一定會阻止。」她指該雞蛋仔店開業不足一年已結業。
