太陽娛樂老闆周焯華（洗米華）之前同Mandy Lieu世紀一拖，最後都係揀定Mandy，搞到正印大婆陳慧玲搞離婚，Mandy又話下個月喺倫敦幫洗米華生第二個BB，仲話呢胎係陀仔，湊夠一個「好字」。
以為「爭米」戰已塵埃落定，Mandy獨享洗米華，但今日有雜誌就話殺出咗新「米女郎」，就係啱啱話同張致恒(Steven)分手嘅、諸葛紫岐旗下藝人莊端兒(Xenia)。時間真係夾都冇咁啱，劇情由上個月喺澳門搞嘅《亞洲電影大獎》開始，講到洗米華見到佢嘅35E八字波超性感胸器，即笑哂口邀請對方合照，之後就傳出太陽集團內部消息喎，話洗米華同Xenia早早已識，不過中間大家唔見咗對方號碼，喺個晚「重遇」就再交換咗電話，之後就傳洗米華成日WhatsApp對方。
報導中又提到洗米華「現在式」嘅Mandy雖然差唔多生得，但佢喺倫敦仲好勤力keep fit做facial，以日薪5千蚊搵健身教練日操4粒鐘，又要學琴畫畫增值自己，如果陀B安胎仲咁忙，真係忙到不可思議，同好天馬行空。
另一邊，就快「過去式」嘅洗米嫂就醉心搞慈善同生意，話佢同洗米華離婚手續未搞妥，洗米嫂懶理洗米華拖咗幾個月都唔肯簽字，Mandy更為呢單嘢同洗米華嗌交。《蘋果》就搵過Mandy經理人問，佢就唔回應佢嘅私人事。
冇派飛機餐畀我！莊端兒鬧爆國泰港龍
前珠寶小姐莊端兒昨日在社交網上滔滔不絕，發洩對國泰港龍航空的不滿！她上載一張有三包濕紙巾的照片並留言：「真係好少會咁不滿！港龍（國泰港龍）航空我以後都唔想再坐！由地勤到機艙服務員態度都令我感到好唔舒服！洗手間竟然冇水洗手。」
記者向莊端兒求證，身在外地的她指昨晨乘搭國泰港龍時頻頻出現問題：「喺櫃枱Check in行李嗰陣，地勤人員態度已經有問題，全程黑面！上到飛機，機艙服務員又唔多禮貌，其後如廁發現洗手間冇水洗手，仲離譜係冇派發飛機餐畀我同經理人，甚至冇問過我哋要唔要用餐！今次乘搭國泰港龍非常失望。」而國泰港龍發言人只回應：「我們會跟進了解，乘客亦可與顧客關係部聯絡。」
